پاکستان تحریکِ انصاف (پی ٹی آئی) کے جنرل سیکریٹری عمر ایوب نے نگراں وزیرِ اعظم اور چیف الیکشن کمشنر کو خط لکھ دیے۔
خطوط کی نقول چاروں نگراں وزرائے اعلیٰ کو بھی بھجوا دی گئی ہیں۔
عمر ایوب نے اپنے خط میں کہا ہے کہ فرخ حبیب، صداقت عباسی، عثمان ڈار، اویس یونس، عرفان سلیم، عبدالکریم اور عوامی مسلم لیگ کے سربراہ شیخ رشید کئی روز سے لاپتہ ہیں۔
خط میں کہا گیا ہے کہ جبری گمشدگیاں آئین میں فراہم کردہ بنیادی حقوق کی خلاف ورزی ہے، ان افراد کی رہائی تک عام انتخابات کی شفافیت پر سوالیہ نشان رہے گا۔
پی ٹی آئی رہنما نے خط میں یہ بھی کہا ہے کہ جبری گمشدگیوں کے ذمے داران کو کٹہرے میں لائے جانے تک انتخابات کی شفافیت پر سوال رہے گا، اُمید ہے متعلقہ اداروں کو ان افراد کی بازیابی کے احکامات جاری کیے جائیں گے۔